Приветствую Вас, Гость

Барысы дүрт кыл анда,

Сызган чакта моңлана.

                   (Скрипка)

                Мөҗәһит Әхмәтҗанов

 

 

Телләре күп булган өчен,

Ике рәткә тезгәннәр.

Аның белән төрле илләр,

Океаннар гизгәннәр.

                  (Хромка)

                Мөҗәһит Әхмәтҗанов

Үзе кыллы, үзе телле,

Идәндә басып тора.

Уйнарга теләгән кеше

Иң беренче – утыра.

              (Пианино)

                   Мөҗәһит Әхмәтҗанов

 

Гармуннарның патшасы мин,

Телләрем йөздән артык.

Яшьләр кулында йөримен,

Тиз генә килмәс картлык.

                  (Баян)

                     Мөҗәһит Әхмәтҗанов

Бер телемдә – ике тавыш,

Кыңгыравым чыңлатам.

Биетәм дә, җырлатам да,

Кирәк икән – елатам.

          (Саратов гармуны)

                    Мөҗәһит Әхмәтҗанов

Сиптерәләр, өздерәләр,

Тарталар, сайраталар.

Җырлатса да, елатса да,

Үзен гел яраталар.

           (Гармунда уйнау)

                       Мөҗәһит Әхмәтҗанов

Килде, басты һәм тартты,

Шуннан абруе артты.

Әбиләрне, бабайларны

Уйлатты да елатты.

           (Гармун)

                Мөҗәһит Әхмәтҗанов

Борынгы булсам да, мине

Онытып бетермиләр.

Милли гармуныбыз диеп,

Сәхнәдән төшермиләр.

               (Тальян)

                  Мөҗәһит Әхмәтҗанов

Иң озын муен миндә,

Иң кыска исем миндә.

Кылларымны чирткәләп,

Көй чыгар инде син дә.

                (Саз)

                    Мөҗәһит Әхмәтҗанов

Нечкә муен,

Пар кыллар.

Чиртер иде

Бар куллар,

Яшьләр уйный

Белмиләр,

Шуңа якын килмиләр.

           (Мандолина)

                 Мөҗәһит Әхмәтҗанов

Күреген дә тартмыйсың,

Теленә дә басмыйсың.

Авызыңа кабасың да

Бер моңланып аласың.

           (Авыз гармуны)

                      Мөҗәһит Әхмәтҗанов

Курайларның туганы мин,

Ләкин тавышым үзгә.

Колакларны ярып керә,

Өстәп куйсаң мөгез дә.

              (Сорнай)

                 Мөҗәһит Әхмәтҗанов

Таш гасырдан ук киләм мин.

Уйнап җибәрәм – өрсәң.

Ватылып юкка чыгармын

Әгәр кулдан төшерсәң.

              (Таш сыбызгы)

                         Мөҗәһит Әхмәтҗанов