Канаты бар, оясы юк,
Ят ояда баласы тук.
(Күке)
Риза Шәфи
Тукланалар бер әртилдә,
Рәхмәтләре төрле телдә.
(Тагарак янында кош-корт)
Риза Шәфи
Тукылдый ул "тук" та "тук"
Өтергесе, чүкече юк,
Көн буе тукылдата.
- Кайрыларны чокый-чокый
Авырттырам, - дип, - борынны, -
Сукрана ул төн ката.
Ә иртәсен тамак аны
Янә эшкә җиктерә.
Әй, син, кара бүрекле кош,
Кәүсәләргә ныклап ябыш,
Койрыгыңны нык терә.
Җәен-кышын шул бер шөгыль,
Тукылдый ул "тук" та "тук"
Агачларны дәваларга,
Уйнарга да өлгерә ул -
Үзе җитез, үзе шук.
(Тукран)
Касыйм Тәхау
Танылган караклыкта
Җәен очмый йорт янында,
Күренми ул урамда.
Балаларын үстерә ул
Куелыкта - урманда.
Кара көздә - авылда ул,
Кунган абзар башына.
Җим ашарга очып төшә
Әтәч - тавык каршына.
Койрыгы һәм канатлары,
Түше, башы чем-кара.
Тыкрыктагы тар сукмактан
Ашыкмый атлап бара.
Оядан күкәй чәлдерә -
Танылган караклыкта.
"Чукыр", "чукыр" кычкыра ул
Урманда, усаклыкта.
(Саескан)
Касыйм Тәхау
Икесен дә яратабыз
Җансызыннан туа тересе,
Тересе җансызык сала.
Берсе тәгәри, ә берсе
Йөри һәм оча ала.
Икесен дә яратабыз!
Хикмәте аның шунда:
Ашап була туганчы да,
Була - суйганнан соң да.
(Йомырка белән тавык)
Зәки Нури
Нинди мичкә?
Булды бик тә күңелле:
Малай ак мичкә ватты.
Башта ак су түгелде,
Соңрак сары су акты.
(Йомырка)
Зәки Нури
Бүләген куйгач, масаеп,
Кыт-кыт килә кытлавык.
Канаты бар - йөзә алмый.
Нәрсә булыр ул? ...
(Тавык)
Гөлсинә Ясәбиева
Яктылыктан курка, төнлә
Оча тычкан сагалап.
Ыргак томшык, сизгер колак
Мәче башлы ...
(ябалак)
Гөлсинә Ясәбиева
Кызыл итек, күк күлмәк,
Җырлый тынычлык теләп.
Исмен белсәң әгәр син,
Әйтеп бирче ...
(Күгәрчен)
Гөлсинә Ясәбиева
Үзе җәнлек, үзе кош
Үзе җәнлек, үзе кош.
Чормаларда асылынып
Йоклап ята көн буе.
Лепер-лепер канат кагып,
Ауда йөри көн буе.
Зур колаклы, нәни башлы,
Канатлары - җилпәзә.
Үзе җәнлек, үзе бер кош -
Табигать биргән мәзәк.
(Ярканат)
Касыйм Тәхау