Приветствую Вас, Гость

Тик бер генә һөнәр беләм:

Кыям, турыйм, юнам, теләм.

                                   (Балта)

                                           Риза Шәфи

 

 

 

Көзме, кышмы, язмы, җәйе,

Тыңламый, нишләтәсең-

Кар буранда, җил яңгырда

Салмый ул эшләпәсен.

                            (Кадак)

                                       Шәүкәт Галиев

 

Озайган саен юлы,

Кыскарадыр койрыгы.

                    (Энә җеп)

                                Риза Шәфи

 

 

 

Кулларында биеткәндә,

Әни җыр суза көйләп.

Тишекләре күп булса да

Ике түгел. Ул....

                    (Иләк)

                          Гөлсинә Ясәбиева

Елан түгел мин – чакмыйм,

Үлән астыннан чабам.

Уңга чабам, сулга чабам,

Җәй җиттеме– шул чарам.

                   (Чалгы)

                        Мөҗәһит Әхмәтҗанов

Төшми кулдан җәй буе:

Хезмәттә бөтен уе.

Кисә, өя, йомшарта,

Шуңа да уңыш арта.

                (Китмән)

                      Мөҗәһит Әхмәтҗанов

Ике куллап тотасың да

Бәрә – бәрә барасың.

Бераз гына үскәч, син дә

Аны тотып карарсың

Һәм файдага ярарсың.

               (Китмәнләү)

                         Мөҗәһит Әхмәтҗанов

Этәләр дә тарталар,

Этәләр дә тарталар.

Мине тотып, тактаны

Нәкъ шулай шомарталар.

              (Фуганка)

                Мөҗәһит Әхмәтҗанов

Хезмәтем бик кечкенә,

Кирәк бары көч кенә.

Менә шушы тактаны

Мине бор да тиш кенә.

            (Борау)

                 Мөҗәһит Әхмәтҗанов

Шак та шок,

Шак та шок

Тукмыйлар үземне.

Мин эшлим,

Мин тишәм,

Мин шундый түземле.

          (Өтерге)

                Мөҗәһит Әхмәтҗанов

Бар очым,

Бар түбәм.

Сугалар –

Мин түзәм.

Кайчакта

Кәпрәям:

Тутыгам,

Кәкрәям.

             (Кадак)

                    Мөҗәһит Әхмәтҗанов

Тешләремнең исәбе юк,

Утын кисәм, “он” ясыйм.

Егет булсаң, кадерне бел,

Мине читкә куйма син.

                     (Пычкы)

                              Мөҗәһит Әхмәтҗанов